រដ្ឋសភាវៀតណាមបានអនុម័តច្បាប់ថ្មីមួយកាលពីថ្ងៃទី 14 ខែមិថុនា ឆ្នាំ 2025 ដែលអនុញ្ញាតឲ្យទ្រព្យសម្បត្តិគ្រីបតូ (crypto assets) ដំណើរការស្របច្បាប់។ ច្បាប់នេះក៏ផ្តល់ការលើកទឹកចិត្តជាច្រើនសម្រាប់បច្ចេកវិទ្យាទំនើបៗដូចជា បញ្ញាសិប្បនិម្មិត (AI), Semiconductors និងហេដ្ឋារចនាសម្ព័ន្ធឌីជីថលផងដែរ។ ច្បាប់ថ្មីនេះនឹងចាប់ផ្តើមអនុវត្តនៅថ្ងៃទី 1 ខែមករា ឆ្នាំ 2026។ ច្បាប់នេះបែងចែកទ្រព្យសម្បត្តិឌីជីថល (digital assets) ជាពីរប្រភេទ៖ ទ្រព្យសម្បត្តិនិម្មិត (Virtual Assets) និង ទ្រព្យសម្បត្តិគ្រីបតូ (Crypto Assets)។ ទាំងពីរប្រភេទនេះពឹងផ្អែកលើបច្ចេកវិទ្យាឌីជីថល ប៉ុន្តែមិនរាប់បញ្ចូលមូលបត្របំណុល ឬលុយអេឡិចត្រូនិកធម្មតាឡើយ។ ឥឡូវនេះ រដ្ឋាភិបាលវៀតណាមនឹងរៀបចំលក្ខខណ្ឌ និងការត្រួតពិនិត្យជាក់លាក់សម្រាប់ទ្រព្យសម្បត្តិទាំងនេះ។ ក្រៅពីនេះ ច្បាប់ក៏តម្រូវឲ្យមានការការពារសុវត្ថិភាពតាមអ៊ីនធឺណិត (cybersecurity) និងវិធានការប្រឆាំងការលាងលុយកខ្វក់ (Anti-Money Laundering - AML) ឲ្យស្របតាមស្តង់ដារអន្តរជាតិ ដើម្បីដោះស្រាយការព្រួយបារម្ភរបស់ FATF ដែលវៀតណាមស្ថិតក្នុង "បញ្ជីប្រផេះ" តាំងពីឆ្នាំ 2023។ ការអនុម័តច្បាប់នេះបង្ហាញពីបំណងប្រាថ្នារបស់វៀតណាមក្នុងការក្លាយជាមជ្ឈមណ្ឌលបច្ចេកវិទ្យាឌីជីថល។ ពួកគេនឹងផ្តល់ការលើកទឹកចិត្តជាច្រើនដូចជា ការបន្ធូរបន្ថយពន្ធ ការគាំទ្រការប្រើប្រាស់ដីធ្លី និងជំនួយផ្នែកស្រាវជ្រាវ (R&D) សម្រាប់ក្រុមហ៊ុនដែលធ្វើការលើ AI, Semiconductors និងហេដ្ឋារចនាសម្ព័ន្ធឌីជីថល។ រដ្ឋាភិបាលមូលដ្ឋានក៏នឹងជួយបណ្តុះបណ្តាលអ្នកជំនាញបច្ចេកវិទ្យា ខណៈដែលកម្មវិធីសិក្សាជាតិក៏នឹងបញ្ចូលជំនាញឌីជីថលផងដែរ។ រដ្ឋាភិបាលវៀតណាមបានអះអាងថា នេះជាប្រទេសដំបូងគេបង្អស់ដែលបង្កើតច្បាប់ផ្តោតលើឧស្សាហកម្មបច្ចេកវិទ្យាឌីជីថលតែម្តង។

ខ្លឹមសារនៃគេហទំព័រនេះគឺសម្រាប់តែការចែករំលែកព័ត៌មាន និងចំណេះដឹងតែប៉ុណ្ណោះ ពួកយើងមិនធ្វើការផ្សព្វផ្សាយ ឬគាំទ្រសកម្មភាពប្រតិបត្តិការ និងការវិនិយោគណាមួយឡើយ។

- Camboswap