កាលពីយប់មិញ ខណៈដែលប្រជាជននៅអាស៊ីយើងកំពុងគេង លោក Trump បានប្រកាសពីការបញ្ចប់ជម្លោះដែលធ្វើឲ្យយើងភ័យខ្លាចថាអាចនឹងផ្ទុះទៅជា សង្គ្រាមលោកលើកទី 3។ រឿងរ៉ាវបានចាប់ផ្ដើមកាលពីម៉ោង 12:00am កណ្តាលយប់ នៅពេលដែលអ៊ីរ៉ង់បានបាញ់មីស៊ីលសងសឹកទៅលើមូលដ្ឋានទ័ពអាមេរិកនៅ Qatar។ អ្វីដែលគួរឲ្យកត់សម្គាល់នោះ គឺមុនពេលបាញ់ អ៊ីរ៉ង់បានប្រាប់ទៅខាងអាមេរិក និង Qatar មុន ដើម្បីកាត់បន្ថយផលប៉ះពាល់ដែលអាចកើតឡើង។ ទូរទស្សន៍ជាតិអ៊ីរ៉ង់ថែមទាំងបានផ្សាយផ្ទាល់ទៀតផង ដែលធ្វើឲ្យប្រជាជនមួយចំនួនចេញមកអបអរសាទរតាមដងផ្លូវ។ ការណ៍នេះអាចជាការសម្តែងមួយ ដើម្បីរក្សាមុខមាត់ជាតិ តែក្នុងពេលជាមួយគ្នាក៏មិនចង់ឲ្យមានបញ្ហាធំដុំកើតឡើងដែរ។ មីស៊ីលទាំងអស់ហាក់ដូចជាត្រូវបានបំផ្លាញដោយប្រព័ន្ធការពារដែនអាកាសរបស់ Qatar ហើយមានព័ត៌មានថា ការវាយប្រហារតិចតួចលើមូលដ្ឋានទ័ពនៅ Iraq ក៏មិនមានផលប៉ះពាល់អ្វីដែរ។ បន្ទាប់ពីការបាញ់មីស៊ីល ដែនអាកាសនៅតំបន់មជ្ឈិមបូព៌ាជាច្រើនត្រូវបានបិទមិនឲ្យយន្តហោះហោះកាត់។ ប៉ុន្តែត្រឹមតែប្រហែល 10 នាទីក្រោយមក មានដំណឹងថា លោក Trump នឹងមិនមានបំណងបាញ់តបតវិញទេ។ នៅម៉ោង 3:00am លោក Trump បានប្រកាសលើ Truth Social របស់លោកថា ការបាញ់របស់អ៊ីរ៉ង់បានបញ្ចប់ដោយមិនមានផលប៉ះពាល់អ្វីឡើយ។ លោកបានអរគុណអ៊ីរ៉ង់ដែលបានប្រាប់មុន និងទុកពេលឲ្យត្រៀម ដែលជួយសង្គ្រោះជីវិតមនុស្ស។ លោកក៏បានលើកទឹកចិត្តឲ្យអ៊ីរ៉ង់ និងអ៊ីស្រាអែល ចាប់ផ្តើមបញ្ឈប់សង្គ្រាម និងរកសន្តិភាពវិញ។ ពីរម៉ោងក្រោយមក នៅម៉ោង 5:00am លោក Trump បានប្រកាសថា អ៊ីស្រាអែល និងអ៊ីរ៉ង់បានយល់ព្រមបទឈប់បាញ់ក្នុងរយៈពេល 6 ម៉ោងទៀត។ ជាលទ្ធផលភ្លាមៗ តម្លៃប្រេងឆៅបានធ្លាក់ថ្លៃវិញ។ តម្លៃទ្រព្យសម្បត្តិ (Assets) នានាក៏បានកើនឡើងមកវិញ ហើយអ្នកវិនិយោគដែលបានភ្នាល់ថាទីផ្សារនឹងធ្លាក់ចុះ (Short sellers) ជាច្រើនត្រូវបានបង្ខំឲ្យបិទការជួញដូរ (Liquidate) ដោយសារការខាតបង់។ ហេតុការណ៍ទាំងនេះបានបង្ហាញពីការធូរស្រាលមួយកម្រិតលើភាពតានតឹងនៅមជ្ឈិមបូព៌ា ដែលនាំមកនូវសញ្ញាវិជ្ជមានដល់ទីផ្សារពិភពលោក។

ខ្លឹមសារនៃគេហទំព័រនេះគឺសម្រាប់តែការចែករំលែកព័ត៌មាន និងចំណេះដឹងតែប៉ុណ្ណោះ ពួកយើងមិនធ្វើការផ្សព្វផ្សាយ ឬគាំទ្រសកម្មភាពប្រតិបត្តិការ និងការវិនិយោគណាមួយឡើយ។

- Camboswap