នៅព្រឹកថ្ងៃទី៤ មករា នេះ និយ័តករហិរញ្ញវត្ថុកំពូលរបស់ប្រទេសកូរ៉េខាងត្បូង បានស្នើសុំឲ្យមានការធ្វើវិសោធនកម្មលើច្បាប់ហិរញ្ញវត្ថុឥណទានរបស់ខ្លួន ក្នុងគោលបំណងហាមឃាត់ដល់ពលរដ្ឋទាំងអស់ក្នុងប្រទេស កុំឲ្យទិញរូបិយប័ណ្ណគ្រីបតូ ដោយប្រើប្រាស់កាតឥណទាន។ ហេតុផលចម្បងសម្រាប់ការធ្វើវិសោធនកម្មថ្មីនេះ គឺដើម្បីកំណត់ឲ្យបានច្បាស់នូវអត្តសញ្ញាណនៃភ្នាក់ងារលក់រូបិយប័ណ្ណគ្រីបតូ ដែលមាននៅលើទីផ្សារជួញដូរគ្រីបតូបរទេស និងដើម្បីកាត់បន្ថយក្តីបារម្ភដែលកើតមានឡើងជុំវិញលំហូរសាច់ប្រាក់ចេញខុសច្បាប់នៃមូលនិធិក្នុងស្រុក ជាពិសេស គឺ ការលាងលុយកខ្វក់។ នៅក្រោមវិសោធនកម្មច្បាប់ស្តីពីរបាយការណ៍ហិរញ្ញវត្ថុនេះ កាលពីឆ្នាំ 2021 អ្នកប្រើប្រាស់គ្រីបតូរបស់កូរ៉េខាងត្បូងត្រូវបានតម្រូវឱ្យធ្វើការជួញដូរដោយប្រើគណនីដកប្រាក់ និងដាក់ប្រាក់លើទីផ្សារជួញដូរក្នុងស្រុក ដោយផ្ទៀងផ្ទាត់ជាមួយឈ្មោះពិតរបស់ពួកគេ។ ទីផ្សារជួញដូររូបិយប័ណ្ណគ្រីបតូក្នុងស្រុកក៏ត្រូវបានទាមទារឲ្យធ្វើការផ្ទៀងផ្ទាត់ដូចគ្នាផងដែរ ដើម្បីអនុវត្តការរៀបចំអាជ្ញាប័ណ្ណ និងផ្តល់សេវាកម្ម fiat-to-crypto យ៉ាងម៉ត់ចត់ រួមទាំងការធានាភាពជាដៃគូជាមួយធនាគារក្នុងស្រុកផងដែរ។ យ៉ាងណាមិញ និយ័តករហិរញ្ញវត្ថុកំពូលរបស់ប្រទេសកូរ៉េខាងត្បូង បានកំណត់យកថ្ងៃទី 13 ខែកុម្ភៈ ឆ្នាំ2024 ជាថ្ងៃបិទបញ្ចប់នៃការស្រង់មតិចំពោះការស្នើុសុំធ្វើវិសោធនកម្មរបស់ខ្លួន។

ខ្លឹមសារនៃគេហទំព័រនេះគឺសម្រាប់តែការចែករំលែកព័ត៌មាន និងចំណេះដឹងតែប៉ុណ្ណោះ ពួកយើងមិនធ្វើការផ្សព្វផ្សាយ ឬគាំទ្រសកម្មភាពប្រតិបត្តិការ និងការវិនិយោគណាមួយឡើយ។

- Camboswap