វេជ្ជបណ្ឌិតឯកទេស អ៊ួង បញ្ញា ក្រពះ ពោះវៀន ថ្លើម និង ឬសដូងបាត ដែលសព្វថ្ងៃបម្រើការនៅផ្នែកប្រព័ន្ធរំលាយអាហារ នៃមន្ទីរពេទ្យមិត្តភាពខ្មែរ-សូវៀត។ បានបកស្រាយថា ដំបៅ​ក្រពះ​ ​គឺជា​ដំបៅ ឬការខូចខាតភ្នាសក្រពះ រហូតដល់ជាលិកាក្រោមភ្នាសក្រពះ ដែលអាចបណ្តាលអោយមានការហូរឈាម ឬឈានដល់ធ្លាយក្រពះឡើងមក។ ជាការពិតណាស់ ក្នុងនោះផងដែរ វេជ្ជបណ្ឌិត បានបកស្រាយថា​មនុស្សដែលងាយប្រឈមកើតជំងឺដំបៅក្រពះច្រើនជាងគេគឺភាគច្រើនលើ អ្នកផឹកស្រាច្រើនពេក ជក់បារី ឬចុកថ្នាំជក់ អ្នកប្រើប្រាស់ជាប្រចាំនូវថ្នាំអាស្ពីរីន (Aspirin), ឬថ្នាំប្រឆាំងនឹងការរលាក (NSAIDs) ដែលដូចជា ibuprofen​ និង naproxen ជាដើមអ្នកមានមេរោគក្រពះ H.pylori អ្នកជំងឺដែលកំពុងព្យាបាលនៅផ្នែកសង្គ្រោះបន្ទាន់កំរិតធ្ងន់។ល។ មួយវិញទៀតវេជ្ជបណ្ឌិត បានបញ្ជាក់ថា ជំងឺដំបៅក្រពះ ប្រសិនណាមិនបានទទួលការព្យាបាលត្រឹមត្រូវអ្នកជំងឺអាចប្រឈមកើតជំងឺមហារីកក្រពះបាន តែមិនមែនគ្រប់ដំបៅក្រពះនៅទេ ដំបៅក្រពះដែលអាចវិវត្តន៍ទៅជាជំងឺមហារីក ភាគច្រើនគឺដំបៅក្រពះ ដែលបណ្តាលមកពីមេរោគក្រពះ។ ជំងឺដំបៅក្រពះមួយចំនួនមិនមានចេញជារោគសញ្ញាឱ្យដឹងនោះទេ តែអ្នកខ្លះទៀតអាចមានចេញរោគសញ្ញាដូចខាងក្រោម៖ -ឈឺពោះ ​ចុកឆ្អល់ ផ្នែកចុងដង្ហើម -ហើមពោះ ឬមានអារម្មណ៍ថាឆាប់ឆ្អែត -មិនឃ្លានអាហារ -ចង្អោរ ឬក្អួត -ករណីធ្ងន់ធ្ងរ អ្នកជំងឺអាចមានក្អួតមានឈាម ឬលាមកពណ៍ខ្មៅ​ ឬឈានដល់ធ្លាយក្រពះ ។ វេជ្ជបណ្ឌិតបានណែនាំថា ប្រសិនណាអ្នកចង់ការពារកុំឱ្យកើតជំងឺដំបៅក្រពះ វេជ្ជបណ្ឌិតប្រាប់វិធីកាត់បន្ថយដូចខាងក្រោម៖ -ជៀងវាងកាពិសារគ្រឿងស្រវឹងច្រើន និងការជក់បារី ឬចុកថ្នាំ -ត្រូវបរិភោគអាហារដែលមានអនាម័យ ដើម្បីជៀងវាងការឆ្លង មេរោគក្រពះ H.pylori -មិនត្រួវប្រើថ្នាំដោយមិនមានវេជ្ជបញ្ជាច្បាស់លាស់ ជាពិសេសប្រភេទថ្នាំ Aspirin និងក្រុមថ្នាំបំបាត់ការឈឺចាប់ NSAIDs។ ជាចុងក្រោយ វេជ្ជបណ្ឌិត បានផ្ដាំផ្ញើថា ត្រូវមានការប្រុងប្រយត្ន័ក្នុងការប្រើប្រាស់ថ្នាំ ជាពិសេសថ្នាំបំបាត់ការឈឺចាប់ ហើយគួរគម្បីទៅជួបពិគ្រោះជាមួយគ្រូពេទ្យឯកទេស ក្រពះ ពោះវៀន និងថ្លើម ប្រសិនបើមានរោគសញ្ញាដែលបានរៀបរាប់ខាងលើ ឬបើសិនជាសង្ស័យថាខ្លួនឯងមានជំងឺដំបៅក្រពះ៕

ខ្លឹមសារនៃគេហទំព័រនេះគឺសម្រាប់តែការចែករំលែកព័ត៌មាន និងចំណេះដឹងតែប៉ុណ្ណោះ ពួកយើងមិនធ្វើការផ្សព្វផ្សាយ ឬគាំទ្រសកម្មភាពប្រតិបត្តិការ និងការវិនិយោគណាមួយឡើយ។

- Camboswap