Michael Saylor ស្ថាបនិកក្រុមហ៊ុន MicroStrategy ត្រៀមថ្លែងសុន្ទរកថារយៈពេល ៣នាទី ទៅកាន់ក្រុមប្រឹក្សាភិបាលរបស់ Microsoft ដើម្បីជំរុញឱ្យក្រុមហ៊ុននេះវិនិយោគលើ Bitcoin។ នេះបើតាមប្រភពពី Cointelegraph។ កាលពីខែតុលា សំណើរបស់មជ្ឈមណ្ឌលជាតិស្រាវជ្រាវគោលនយោបាយសាធារណៈ (NCPPR) បានស្នើឱ្យ Microsoft វិនិយោគ ១% នៃទ្រព្យសកម្មសរុបរបស់ខ្លួនទៅលើ Bitcoin។ ទោះបីជាក្រុមហ៊ុន Microsoft បានណែនាំឱ្យម្ចាស់ភាគហ៊ុនបោះឆ្នោតប្រឆាំងនឹងសំណើនេះក៏ដោយ ដោយសារកង្វល់អំពីភាពមិនប្រាកដប្រជានៃតម្លៃ Bitcoin ក៏សំណើនេះបានទទួលការចាប់អារម្មណ៍យ៉ាងខ្លាំងពីវិនិយោគិន។ លោក Saylor បានបញ្ជាក់ថា គាត់បានស្នើសុំជួបជាមួយលោក Satya Nadella នាយកប្រតិបត្តិ Microsoft ដើម្បីពិភាក្សាអំពីបញ្ហានេះ ប៉ុន្តែសំណើនោះមិនត្រូវបានទទួលយកទេ។ គាត់ជឿថាការវិនិយោគលើ Bitcoin អាចធ្វើឱ្យក្រុមហ៊ុន Microsoft កាន់តែមានស្ថិរភាព និងមានហានិភ័យតិចជាងមុន។ បច្ចុប្បន្ន ៩៨,៥% នៃតម្លៃសហគ្រាសរបស់ Microsoft មកពីប្រាក់ចំណូលប្រចាំត្រីមាស ហើយមានតែ ១,៥% ប៉ុណ្ណោះដែលមកពីទ្រព្យសម្បត្តិរូបីរបស់ខ្លួន។ កិច្ចប្រជុំម្ចាស់ភាគហ៊ុនរបស់ Microsoft នឹងធ្វើឡើងនៅថ្ងៃទី១០ ខែធ្នូ ដើម្បីបោះឆ្នោតលើសំណើនេះ។ ក្រុមប្រឹក្សាភិបាលរបស់ Microsoft ដែលមានសមាជិក១២រូប បានអះអាងថាក្រុមហ៊ុនត្រូវការការវិនិយោគដែលមានស្ថិរភាព និងអាចព្យាករណ៍បាន ដើម្បីធានាបាននូវសាច់ប្រាក់ងាយស្រួល។ គួរបញ្ជាក់ថា MicroStrategy ដែលជាក្រុមហ៊ុនរបស់លោក Saylor ទើបតែបានប្រកាសទិញ Bitcoin ចំនួន ៥១,៧៨០ បន្ថែមទៀតក្នុងតម្លៃជាមធ្យម ៨៨,៦២៧ដុល្លារ ដែលធ្វើឱ្យចំនួន Bitcoin សរុបរបស់ក្រុមហ៊ុនកើនដល់ ៣៣១,២០០។

ខ្លឹមសារនៃគេហទំព័រនេះគឺសម្រាប់តែការចែករំលែកព័ត៌មាន និងចំណេះដឹងតែប៉ុណ្ណោះ ពួកយើងមិនធ្វើការផ្សព្វផ្សាយ ឬគាំទ្រសកម្មភាពប្រតិបត្តិការ និងការវិនិយោគណាមួយឡើយ។

- Camboswap